بۇل تۇرعىدان العاندا جەتىسۋلىق اق جەلەڭدى ابزال جانداردىڭ جۇمىسىنا جوعارى باعا بەرۋگە بولادى. كاسىبي بىلىكتىڭ كۇن ساناپ ارتىپ, مەملەكەت تاراپىنان جاسالعان قولداۋدىڭ جىل ساناپ جاقسارۋى ايماقتاعى مەديتسينا سالاسىنىڭ دامۋىن جاڭا بەلەسكە كوتەرىپ وتىر. مەملەكەت قولداۋى دەگەننەن شىعادى, قازىر وبلىستاعى مەديتسينا مەكەمەلەرىنىڭ الەۋەتى جاقسارعان. مىسالعا, وتكەن جىلى عانا الماتى وبلىسىندا 17 دەنساۋلىق ساقتاۋ نىسانى قولدانىسقا بەرىلىپ, ولاردىڭ قاتارىندا 7 دارىگەرلىك امبۋلاتوريا, 8 فەلدشەرلىك-اكۋشەرلىك پۋنكت قىزمەت كورسەتۋدى باستادى. بيىل ەمحانالار مەن فەلدشەرلىك پۋنكتەردى جاڭادا نسالۋ مەن كۇردەلى جوندەۋ جۇمىستارى جالعاسادى. ءدال وسى ماقساتتا بيۋدجەتتەن 11,7 ملرد. تەڭگە قاراستىرىلعان. مۇنان بولەك, وڭىردەگى مەديتسينا مەكەمەلەرىنىڭ ماتەريالدىق-تەحنيكالىق بازاسىن نىعايتۋعا دا ايرىقشا كوڭىل ءبولىنىپ, جىل باسىنان بەرى 3,4 ملرد تەڭگەگە قوسىمشا زاماناۋي مەديتسينالىق قۇرال-جابدىقتار ساتىپ الىندى. ال دەنساۋلىق ساقتاۋ سالاسىنىڭ وسى جىلعى بيۋدجەتى 46,4 ملرد تەڭگەنى قۇرادى.
ارينە, مەديتسينا سالاسىنىڭ جۇمىسىن الەۋمەتتىك كوزقاراس تۇرعىسىنان ساراپتاعاندا تولىققاندى وڭ باعالاۋ مۇمكىن ەمەس. ياعني, دەنساۋلىق ساقتاۋ سالاسىنا سىن كوپ ايتىپ, دارىگەرلەردىڭ ءمىنى دە كوپتەپ كورىنىپ تۇراتىنىن جاسىرا المايمىز. راس, بۇل سالادا پروبلەما شاش-ەتەكتەن. بىراق, ءبىر جاقتى باعالاۋ ادام جانىنا اراشا تۇسىگە ءاردايىم اسىعاتىن, گيپپوكرات انتىنا مەيلىنشە ادال اق جەلەڭ كيگەن ازاماتتاردىڭ قىزمەتىن ىسكە العىسىز قىلۋعا سەبەپ بولماۋى ءتيىس. وتان مەديتسيناسىنىڭ كوشىن ىلگەرى سۇيرەپ كەلە جاتقان قاراپايىم دارىگەرلەردىڭ لايىقتى باعاسىن ءبىلۋىمىز كەرەك. شيپالى قولىمەن, قامقور نيەتىمەن ەل العىسىنا بولەنگەن دارىگەرلەر جەتىپ ارتىلادى. ولارعا دەگەن قۇرمەت تە شەكسىز. مىسالعا, الماتى وبلىسىنىڭ اكىمدىگى مەديتسينا قىزمەتكەرلەرىنىڭ كاسىبي مەرەكەسى قارساڭىندا ايماقتاعى ەڭبەگى جانعان دارگەرلەردى ماراپاتتاپ, قۇرمەت كورسەتۋدى داستۇرگە اينالدىرعان. وسى ءۇردىس بيىل دا جالعاسىپ, كۇنى كەشە «ۇزدىك دارىگەر», «ۇزدىك اۋىل دارىگەرى» جانە «ۇزدىك حيرۋرگ» اتالىمدارى بويىنشا قارا ءۇزىپ شىققان جەڭىمپازدار ماراپاتتالدى. دەنساۋلىق ساقتاۋ ماماندارىن مەديتسينا قىزمەتكەرلەرى كۇنى مەرەكەسىمەن قۇتتىقتاعان وبلىس اكىمىنىڭ ورىنباسارى جاقسىلىق ومار ۇزدىك دارگەرلەرگە 1 ميلليون تەڭگە اقشالاي سىيلىق تاپسىردى. وبلىستا دەنساۋلىق ساقتاۋ سالاسىنا ەرەكشە نازار اۋدارىلاتىنىن توقتالعان اكىمنىڭ ورىنباسارى:
- ءبىز كۇندەلىكتى كۇردەلى دە جاۋاپتى ءىستى ابىرويمەن اتقارىپ جۇرگەن مەديتسينا سالاسىنىڭ بارلىق قىزمەتكەرلەرىنە زور ريزاشىلىق بىلدىرەمىز. ءوز تاراپىمىزدان مەديتسينالىق قىزمەت كورسەتۋ ساپاسىن ارتتىرۋعا, مەديتسينا ماماندارىنىڭ الاڭسىز جۇمىس ىستەۋىنە قولايلى جاعداي تۋدىرۋعا بار مۇمكىندىكتى جاسايمىز. حالىقتىڭ دەنساۋلىعىن نىعايتۋ, سالاماتتى ءومىر سالتىنا ۇندەۋ – بارشامىزدىڭ ورتاق ماقساتىمىز,– دەدى قۇتتىقتاۋ سوزىندە.
بيىل جەتىسۋدىڭ ۇزدىك دارگەرلەرىن انىقتاۋ 11 نوميناتسيا بويىنشا جۇرگىزىلىپتى. ناتيجەسىندە قاراساي اۋداندىق ورتالىق اۋرۋحانانىڭ رەانيماتسيا ءبولىمىنىڭ مەڭگەرۋشىسى داميليا قىلىشپاەۆا «ۇزدىك دارىگەر», تالعار اۋدانى كەڭدالا دارىگەرلىك امبۋلاتورياسىنىڭ مەڭشەرۋشىسى مادينا كارامشۋك «ۇزدىك اۋىل دارىگەرى», تالدىقورعان كوپ سالالى اۋرۋحاناسىنىڭ حيرۋرگ دارىگەرى ەركەن يساەۆ «ۇزدىك حيرۋرگ» جانە قاپشاعاي قالالىق اۋرۋحاناسى ديرەكتورىنىڭ ورىنباسارى ايسۇلۋ وڭعاروۆا «دەنساۋلىق ساقتاۋ سالاسىنىڭ ۇزدىك مەنەدجەر-ۇيىمداستىرۋشىسى» اتانىپ, جۇلدەگەرلەر قاتارىنان كورىندى.
سونداي-اق, مەديتسينا مەكەمەلەرى اراسىنان جامبىل اۋدانى ىنتىماق اۋىلدىق دارىگەرلىك امبۋلاتورياسى «ۇزدىك اۋىلدىق دارىگەرلىك امبۋلاتوريا», ىلە اۋداندىق ورتالىق اۋرحاناسى «ۇزدىك اۋداندىق ورتالىق اۋرۋحانا», تالدىقورعان قالالىق بالالار اۋرۋحاناسى «ۇزدىك مەديتسينالىق مەكەمە» نوميناتسيالارى بويىنشا جەڭىمپاز بولىپ, اقشالاي سىيلىقتارعا يە بولدى.
قالماحانبەت مۇقامەتقالي,
«ەگەمەن قازاقستان».
الماتى وبلىسى.
